طيب كبداية ... كل سنة وانتم طيبين ...
تقريباً عدت سنة من وقت ما كتبت فى المدونة
فى السنة اللى فاتت اتعلمت حاجات كتير ...
اشتغلت , والدنيا علمتنى اكثر من اللى اتعلمته فى 7 سنين كلية
بس المرة دى الحدث يستحق الرجوع للكتابة .. المرة دى انا اتاكدت من عيب رهيب فى شخصيتى
انا اتأكدت انى دايماً محتاج زقة ؟
اغلب قرارتى فى الحياة محتاجة زقة
يعنى النهاردة كانت قعدة النيابات .. المفروض بنروح نختار التخصص اللى احنا عاوزينه على حسب ترتيبنا فى المجموع ...
تقريبا بقالى شهر بحالة بقارن بين حاجتين ... تخصصين بالنسبة ليا متقاربيين للغاية ... وبعد ما اقنعت الدنيا كلها انى حاخد واحد منهم
غيرت رأيي واخدت التخصص التانى :) ... تسألنى ليه ... اقولك ما اعرفش :) ... بس الحقيقة انى عارف كويس اللى حصل
اللى حصل انى عارف كويس اللى يناسبنى .. ودايما ببقى عارف انا حقرر ايه ... بس امتى دى المشكلة !
دايماً بدور على اللى يزقنى زقة فى اللحظة الاخيرة ...
وعادة صاحب " الزقة " بيبقى شخص ثقة ...
حتلاقى نفسك دايما بتدور عليه وقت الزنقة ... ما بتبقاش محتاج منه غير انه يقولك على اللى بتفكر فيه ... المهم دا حصل والحمد لله اتخصصت تخدير ...
بس المشكلة بالنسبة ليا حاليا انى ما زلت غير قادر على ان اكون صاحب تلك
الزقة " ... ساعات بتخيل نفسى من غير اى حد حواليا ... من غير اى حد ارمى عليه حمل القرار النهائى ... من غير اى شخص قد ارمى عليه اللوم يوما على هذا القرار " ولو خداعا " !!
الزقة " ... ساعات بتخيل نفسى من غير اى حد حواليا ... من غير اى حد ارمى عليه حمل القرار النهائى ... من غير اى شخص قد ارمى عليه اللوم يوما على هذا القرار " ولو خداعا " !!
وقتها مش عارف حعمل ايه ! حياتى حتبقى ازاى ؟
يعنى مثلا احيانا بتساءل ليه بهرب من مسئولية الارتباط دايماً ؟!
يمكن عشان مش لاقى صاحب " الزقة " ؟!
طيب ما هو انا اللى بعمله ؟ انا اللى بصنعه واستعمله ؟
وبمزاجى بتحجج بزقته ... وبمزاجى بعمل نفسى مش حاسس بيها !
طب يمكن انا عارف انا عاوز ايه .. او مش عارف !!
ولا اقولك ... محتاج زقة عشان اقرر !
